Liñas xerais do orzamento para 2022
APROBADA A EMENDA PRESENTADA POR CUPAS QUE ESTABLECE O PRÓXIMO 1 DE XANEIRO COMO DATA DE IMPLANTACIÓN EFECTIVA DA CARREIRA HORIZONTAL DO PAS
Con 135 votos a favor, tres en contra e cinco en branco, a reunión do Claustro do pasado venres, 6 de maio, aprobou o texto definitivo das Liñas Xerais do Orzamento da USC para 2022. Dende CUPAS queremos destacar a aceptación polo Claustro das nosas emendas. Principalmente, unha referida á implantación efectiva da carreira horizontal e outra sobre a continuidade na revisión da RPT e a inclusión, na OPE de 2022, dunha nova oferta de promoción interna independente.
Tamén foron aprobadas as outras dúas emendas presentadas por CUPAS: unha sobre a necesidade de definir ámbitos ou especialidades profesionais para o Persoal de Apoio á Investigación e a outra para dar prioridade ás actuacións en materia de riscos laborais.
Con respecto á carreira horizontal do PAS, único colectivo de persoal público do noso entorno no que aínda non se implantou, a nosa emenda quere evitar novos aprazamentos, con motivo de estudos ou trámites previos, e establece un réxime extraordinario de implantación, en liña co acordado en 2019 na administración autonómica, en tanto non se desenvolve o sistema ordinario.
O texto final aprobado quedou da seguinte maneira:
“Tendo en conta que o deseño dos mecanismos de avaliación aínda non están listos, e que xa os orzamentos de 2021 prevían para ese ano a negociación da posta en marcha da carreira profesional horizontal do PAS, en canto se aproben os orzamentos de 2022 negociarase o réxime extraordinario para o acceso ao grao I da carreira profesional para o PAS que se implantará con carácter efectivo o 1/01/2023.
Unha vez concluído o deseño dos mecanismos de avaliación do rendemento, negociaranse e aprobaranse as bases do sistema ordinario para o acceso aos distintos graos de carreira profesional do PAS”.
Coa emenda referida á Promoción Interna independente e revisión da RPT, tratabamos dende CUPAS que o texto das liñas xerais teña en conta as necesidades e compromisos de revisión xeral da RPT, o desenvolvemento dos dereitos de promoción interna e a revisión dos incentivos á xubilación anticipada. Ao texto inicial das liñas xerais do orzamento para 2022 engadíuselle o seguinte:
…continuará a reforma e reorganización das estruturas co obxecto de acompasar os cambios na xestión cunha estrutura de persoal que responda ás novas necesidades “e teña en conta a obriga permanente de revisar postos de traballo.
Tamén con ese obxectivo, na OPE 2022, continuaranse desenvolvendo e ampliando os dereitos de promoción do persoal mediante a inclusión dunha oferta de promoción interna independente, continuando así a dar cumprimento aos compromisos do Plan de PAS. Igualmente, e na liña de favorecer a renovación xeracional, adecuaranse os incentivos a xubilación anticipada, previstos no convenio colectivo de 2008, a normativa actual da seguridade social e ao incremento da idade de xubilación.”
En canto ás outras dúas emendas, aprobadas a proposta de CUPAS, a primeira delas referida ao Persoal investigador e de apoio á investigación, deixou o texto final coa seguinte redacción:
As reformas normativas en relación co persoal temporal do ámbito da investigación marcan igualmente a axenda deste exercicio 2022, ao igual que a necesidade de seguir avanzando no proceso de conformación de estruturas de investigación máis sólidas e eficientes, “así como na definición de ámbitos ou especialidades profesionais do persoal de apoio.”
A última das emendas que presentamos, que tamén foi aceptada, afecta con carácter xeral aos centros da USC e compromete a que se lle dea prioridade ás actuacións que eliminen ou corrixan situacións de risco laboral, derivadas de incumprimentos normativos.
Non podemos máis que expresar a nosa satisfacción pola aprobación destas emendas. Con todo, somos conscientes de que haberá que seguir traballando e o equipo de goberno terá que cumprir. As organizacións sindicais, así como a Xunta de PAS e o Comité intercentros, terán que actuar con persistencia e capacidade negociadora para concretar eses compromisos.
A representación de CUPAS no Claustro está formada polas seguintes persoas, ás que te podes dirixir para facernos chegar as túas opinións, consultas e suxestións:
CAMPUS DE LUGO
| TACÓN FERNÁNDEZ, ENRIQUE |
| RODRÍGUEZ NUÑEZ, JAVIER |
| PIÑEIRO GÓMEZ, VERÓNICA |
CAMPUS DE SANTIAGO
| LAMAS ALVARIÑO, JESÚS JUAN | ALONSO MOUGAN, ANA M. PILAR |
| DÍAZ PÉREZ, JOSÉ | MARTÍNEZ MAQUIEIRA, ALEJANDRA |
| GARCÍA ANGULO, MINIA | CABADO LOURÉS, ANXOS |
| REGUEIRA GAY, RUBÉN | PAZOS GULDRÍS, M. JOSÉ |
| BALEA COTOS, MARTA | OREIRO FORMOSO, JUAN |
| CACHEIRO MARTÍNEZ, MARTIN | VAZQUEZ MARTÍNEZ, ELENA MARTA |
