RESUMEN DA REUNIÓN DO CONSELLO DE GOBERNO DO 26 DE ABRIL DO 2024
Unha vez máis, atendendo ao noso compromiso de informar da actividade que desenvolvemos no Claustro e no Consello de Goberno en representación do persoal, informamos a continuación da nosa intervención e dos asuntos de maior interese abordados na reunión do Consello de Goberno do pasado venres, 26 de abril:
Plan PETXAS
Un dos puntos da orde do día con relación máis directa co persoal era a aprobación do Plan do Persoal Técnico, de Xestión e de Administración e Servizos (PTXAS) que, como sabedes, é a actual denominación do PAS na nova lei de universidades. Na súa presentación, o xerente destacou o amplo apoio obtido na Mesa de negociación de PAS e que os seus compromisos deben ser acadados antes do remate de 2025, coa finalización do mandato do equipo de goberno.
Por parte de CUPAS, pedimos a palabra, neste punto, para sinalar que a presentación do Plan vén a dar cumprimento a unha das nosas emendas aos orzamentos de 2023 e que, aínda que se presentou tarde, o documento inicial foi mellorado na negociación coa representación sindical. O plan precisaría dunha maior concreción, pero indicamos que iso se poderá corrixir, atendendo as propostas xa presentadas pola representación do sindical, cando se aborde a negociación concreta e o desenvolvemento das liñas xerais do Plan.
Destacamos na nosa intervención que o Plan ten o noso apoio; porque representa unha aposta e un compromiso da USC, por continuar desenvolvendo a promoción interna, a carreira horizontal, a continuidade na revisión da RPT, e pola mellora dos servizos e das condicións de traballo do persoal, que son os temas que mais nos interesan a CUPAS.
Valoramos tamén que, na discusión previa sobre o Plan, a xerencia aceptara por fin que o informe para as comisións de servizo do persoal funcionario deixará de ser vinculante; e que se avaliarán todas as solicitudes, sen exclusións. Chamamos a atención do xerente, neste punto, sobre que esta mesma semana se publicou aínda unha listaxe provisional con exclusións, por causa do informe previo.
O xerente na súa resposta reiterou os compromisos coa promoción, a carreira horizontal e a revisión da RPT. Con respecto á carreira horizontal, indica que se avanzará en 2024 e 2025 no seu desenvolvemento e implantación. Tamén informou que están ultimando un plan piloto de avaliación do rendemento. Con respecto dos informes das comisións de servizo queda en revisar a situación e comprométese novamente a solucionar o tema segundo o acordado.
Sen que se producira ningunha outra intervención por parte dos representantes do PAS, o plan foi aprobado por asentimento dos membros do Consello de Goberno, sen votos en contra nin abstencións.
Modificación RPT
En relación ao PTXAS había tamén outro punto que era a modificación da RPT, que afecta a algúns postos de persoal laboral e funcionario, que contaba cos informes previos favorables tanto do comité intercentros como da xunta de PAS funcionario. Estes cambios puntuais na RPT, que tamén foron aprobadas por asentimento, permiten a toma de posesión das persoas con postos singularizados que promocionaron a Técnico de Grao Medio de Investigación de grupo II e modifican os requisitos e méritos de idiomas dalgúns postos de funcionarios, así como tamén se recoñece a xornada irregular dos postos de arquitecto/a.
Outros asuntos
Con respecto aos demais temas da orde do día, case todos relacionados con cuestións académicas e de profesorado, foron aprobados por asentimento. A excepción foi o regulamento de estudos de doutoramento, sobre o que na xuntanza se achegaron múltiples propostas de modificación. Unha delas formulada tamén dende CUPAS referíase á duración dos estudos de doutoramento, iniciados con anterioridade ao presente curso, para adaptala á nova normativa.
Xa no final da xuntanza o noso compañeiro Fernando Sedano, representante do colectivo nacionalista A Trabe, anunciou a súa renuncia a formar parte do Consello de Goberno por pasar asumir un posto en réxime de Encomenda de Funcións, de asesoramento á vicerreitoría de política científica e á xerencia. Dende CUPAS queremos agradecerlle a Fernando o seu traballo, as súas aportacións e o seu talante como digno representante do persoal no Consello de Goberno, sempre aberto á busca da mellora para o persoal ao que representamos e para a USC en xeral.
Recordamos, por se nos queres facer chegar as túas opinións, consultas ou suxestións, que a representación de CUPAS no Claustro está formada polas seguintes persoas:
CAMPUS DE LUGO
| TACÓN FERNÁNDEZ, ENRIQUE |
| RODRÍGUEZ NUÑEZ, JAVIER |
| PIÑEIRO GÓMEZ, VERÓNICA |
CAMPUS DE SANTIAGO
| LAMAS ALVARIÑO, JESÚS JUAN | MARTÍNEZ MAQUIEIRA, ALEJANDRA |
| DÍAZ PÉREZ, JOSÉ | CABADO LOURÉS, ANXOS |
| GARCÍA ANGULO, MINIA | PAZOS GULDRÍS, M. JOSÉ |
| BALEA COTOS, MARTA | OREIRO FORMOSO, JUAN |
| CACHEIRO MARTÍNEZ, MARTIN | EIROA ROSADO, ELISA |
| VÁZQUEZ MARTÍNEZ, ELENA | FARIÑA FERNÁNDEZ ,JAIME |
| PÉREZ TRIGO, ELISEO | TABERNERO DUQUE, FERNANDO |
| ALONSO MOUGAN, ANA M. PILAR |
