Aberta a convocatoria de prazas de aloxamento do Servizo Universitario de Residencias para 2015-2016

A oferta de aloxamento no Servizo Universitario de Residencias (SUR) para o vindeiro curso académico ascende a 1.071 prazas, a maior parte –945– para estudantado de grao e de primeiro e segundo ciclo. Para as solicitudes de readmisión, o prazo xa está aberto e estenderase ata o próximo 1 de xuño. No caso de solicitantes de nova admisión, o prazo de presentación abranguerá do 1 ao 26 de xuño, ambos incluídos, e ata o 30 de xuño para as persoas que cubran a solicitude no formulario habilitado na web do SUR. A convocatoria tamén reserva 48 prazas para estudantado de másteres universitarios, 41 para os de programas de doutoramento a tempo completo e investigadores en formación, outras 27 para membros da comunidade universitaria con necesidades educativas específicas derivadas dunha condición de discapacidade, 5 para estudantes e posgraos propios e outras tantas para persoal docente e investigador e de administración e servizos. Alumnado internacional No caso do estudantado que participe nos programas de mobilidade internacional e no Programa de Atención a Estudantes de fóra da Unión Europea (programa PATEX) que foran admitidos na USC para cursar estudos en 2015-2016, o SUR oferta un total de 118 prazas, individuais no Campus de Lugo e dobres ou individuais no de Compostela. O prazo para a presentación de solicitudes rematará o 30 de xuño. Universidades Verán 2015 Entre o 8 de xuño e o 30 de agosto, o SUR desenvolve unha convocatoria específica de prazas de aloxamento para membros da comunidade universitaria ou alumnado da Universidade de Verán 2015. Diríxese a residentes que por motivos académicos ou laborais debidamente xustificados acrediten a súa necesidade de permanencia neses meses, a persoas que realicen traballos de investigación, de administración ou laborais que impliquen a necesidade de permanencia continuada en Santiago ou Lugo ou a participantes nas actividades da Universidade de Verán 2015. Residentes e colexiais do presente curso que desexen continuar no centro deberán comunicalo antes do 1 de xuño. Para o resto de solicitantes, a convocatorias estará aberta ata as 14.00 horas do 10 de xullo.