A praia das Catedrais e Belesar, metas das rutas de sendeirismo do mes de outubro

As propostas de sendeirismo do Servizo de Deportes para este mes de outubro concentraranse no final do mes, os días 20 e 27, cunha ruta de Ribadeo á praia das Catedrais, pola costa, e outra polos Socalcos de Belesar. A primeira das propostas ten unha lonxitude de 22 quilómetros e dificultade media, definindo unha ruta de altísimo interese paisaxístico e natural. O trazado polos Socalcos do Belesar, o día 27 de outubro, discorre ao longo de 13 quilómetros, igualmente de dificultade media, por paisaxes rurais típicas, carballeiras e soutos ata o encoro de Belesar. Como sinalan dende o Servizo de Deportes, é unha boa ocasión para a xente que queira iniciarse no sendeirismo. A estas dúas propostas, súmanse os Roteiros por Compostela e arredores que nesta ocasión achegaranse á zona do río Sar no Concello de Brión ao longo de 9 quilómetros de dificultade media-baixa. Para acadar máis información, as persoas interesadas poden dirixirse á paxina web do Servizo de Deportes, no apartado relativo a ‘ Actividades na natureza’.