Recursos electrónicos

Recursos creados polo GI-1350 Románicas

---

Cartografía da lírica profana galego-portuguesa – CANTICAR

CANTICAR é un recurso que materializa de forma gráfica os topónimos da lírica profana galego-portuguesa non só para completar o coñecemento sobre a propia toponimia medieval, senón tamén para que os seus usuarios comprendan as dimensións sociopolíticas en que os textos foron elaborados, xa que, entre outras prestacións, ofrece a reconstrución das fronteiras dos reinos peninsulares ao longo do movemento trobadoresco (ca. 1170-1350).

 

---

Redes socioculturais da lírica galego-portuguesa

As cantigas de escarnio e as tenzóns permiten testemuñar contactos entre autores da escola lírica galego-portuguesa. Este portal destínase a brindar unha valiosa información literaria, histórica e biográfica sobre eses trobadores e xograres, así como a facilitar novas perspectivas sobre as redes socioculturais e literarias dos autores, proporcionando unha nova ferramenta para a investigación.

 

---

Bibliografía de Referencia do Arquivo Galicia Medieval – BiRMED

A Bibliografía de Referencia do Arquivo Galicia Medieval (BiRMED) é unha base de datos de bibliografía especializada na produción científica dedicada á lírica trobadoresca, Cantigas de Santa Maria e prosa literaria. O principal obxectivo de BiRMED é servir como ferramenta aos investigadores da literatura medieval, pois facilita a localización de referencias tematicamente especializadas e favorece o coñecemento de produción científica que se está a desenvolver, sobre a literatura medieval galego-portuguesa, tanto en Galicia como noutras áreas xeográficas.

 

Desde a apertura da primeira versión (1998), BiRMED recompilou máis de 5000 fichas bibliográficas e ampliou as súas posibilidades. Entre outras accións, proporciona un “índice de citas” que permite, por unha banda, coñecer a bibliografía citada en cada rexistro e, por outra, saber onde aparece referenciado o traballo en cuestión.

 

---

Publicacións do Arquivo Galicia Medieval – ArGaMed

ArGaMed é unha serie de publicacións que complementa os proxectos Lírica profana galego-portuguesa, Cantigas de Santa Maria, Prosa literaria galega medieval e BiRMED, todos eles levados a cabo no Centro Ramón Piñeiro para a Investigación en Humanidades.

 

Publica dous números por ano, que poden conter estudos ou edicións (críticas ou paleográficas, novas ou revisadas) relacionados cos proxectos mencionados. Tamén teñen cabida na serie tanto monografías (de autoría individual ou colectiva) como misceláneas de traballos dun mesmo autor ou de autores diferentes.

 

---

Base de datos da Lírica profana galego-portuguesa – MedDB

En maio de 1998, o Proxecto Lírica profana galego-portuguesa do Centro Ramón Piñeiro para a Investigación en Humanidades deseñou a primeira ferramenta dixital que puxo a disposición do público interesado e académico o corpus completo das cantigas medievais dos trobadores galego-portugueses, complementada con información histórica e retórica que permitía realizar buscas de moi diversos tipos. O obxectivo principal era achegar as cantigas á comunidade dun xeito áxil, rigoroso, actualizado e adaptado aos intereses de cada usuario, finalidade que tamén motiva a versión actual da ferramenta, aberta ao público desde xuño de 2016.

 

MedDB3 mellora sensiblemente as versións anteriores, pois ofrece as trascricións das Notas coloccianas e das Rúbricas explicativas presentes nos testemuños manuscritos, amplía o espectro de campos de busca, permite o acceso sen rexistro previo á variedade de Buscas simples e actualiza tanto as edicións críticas do corpus, como a información achegada para as cantigas e trobadores en función dos progresivos avances da produción científica.