Representantes de medio cento de universidades de toda España coñecerán na USC as particularidades do novo Suplemento Europeo ao Título

Representantes de preto de medio centenar de universidades españolas reuniranse este venres 8 en Compostela nunhas xornadas que analizan a implementación da expedición do Suplemento Europeo al Título (SET), un dos instrumentos básicos do proceso iniciado en Bolonia. O SET é un modelo de información unificado e personalizado para o titulado universitario sobre os estudos cursados, o seu contexto nacional e as competencias e capacidades profesionais adquiridas. O seu obxectivo é incrementar a transparencia das diversas acreditacións europeas e facilitar o seu recoñecemento por outras institucións. A USC foi a primeira das universidades españolas en expedir o SET en todas as súas titulacións por consideralo un documento esencial para a mobilidade e empregabilidade do seu alumnado. A xornada do próximo venres permitirá aos participantes coñecer o novo decreto de 2015 que establece un novo modelo de SET no que se mellora a información e se edita un formato máis sinxelo de implantar. No encontro tamén se aludirá á guía en proceso de elaboración que establece pautas e modelos para que todas as universidades traballen de maneira coordinada no Sistema Español de Universidades e que o resultado sexa un formato único normalizado. Outro dos asuntos que se tratará será o Suplemento Europeo ao Título Electrónica (e-SET), como un primeiro paso cara a acreditación de estudos superiores en formato electrónico. O e-SET é unha proposta nacida no seo da USC ratificada polo pleno da Conferencia de Reitores de Universidades Españolas (CRUE). No transcurso do programa previsto presentaranse os traballos para que a estrutura do SET poda servir como modelo de intercambio de datos ou interoperabilidade entre institucións do Espazo Europeo de Educación Superior, non só españolas senón de todo o ámbito europeo internacional. Na inauguración das xornadas está prevista a participación do secretario xeral de Universidades do Ministerio, Juan Vázquez Rozas e do reitor Juan Viaño.