Domingo L. González Lopo e Camilo Fernández Cortizo participaron, xunto con tres investigadores portugueses e brasileiros, no Curso de Formación Metodolóxica organizado pola Cátedra Unesco sobre Migracións
Na inauguración do curso estiveron presentes os coordinadores da Cátedra: Julio Hernández Borge (segundo pola esquerda na foto), profesor de Xeografía Humana, e Domingo L. González Lopo (terceiro pola esquerda), Director do Departamento de Historia Medieval e Moderna da USC e membro, asemade, do Grupo de Investigación de Historia Moderna. O curso corresponde co ciclo de conferencias organizado anualmente pola Cátedra Unesco, que acada nesta ocasión a súa novena edición.
No curso participaronn varios investigadores portugueses e brasileiros, ademais do propio coordinador adxunto da Cátedra, Domingo L. González Lopo, e o tamén membro do Grupo de Investigación de Historia Moderna, Camilo Fernández Cortizo (primeiro pola esquerda). O programa de intervencións centrouse na emigración portuguesa cara o norte do Brasil e de galegos cara a Portugal, ainda que os relatorios tamén prestaron atención ao estudo demográfico das epidemias na Amazonía e ao mecenado dos emigrados galegos.
O profesor e investigador do Centro de História da Universidade de Lisboa João dos Santos Ramalho Cosme (primeiro pola dereita) abriu as sesións de traballo coa ponencia titulada “A emigração para o Pará vista através dos passaportes depositados no Arquivo Nacional-Torre do Tombo”. A Profa. Dra. Cristina Donza Cancela (terceira pola dereita), da Universidade Federal do Pará (Brasil) ocupouse da “Migração portuguesa para o Norte do Brasil: fluxos e trajetórias”. Antonio Otaviano Vieira Junior (segundo pola dereita), investigador na mesma universidade brasileira, disertou sobre a “Epidemia de sarampo e migração para Amazônia (1750-1778): açorianos e africanos”. Os dous últimos relatorios correron a cargo de senllos membros do Grupo de Investigación: Camilo Fernández Cortizo ocupouse da “Mobilidade galega cara o Norte de Portugal: fontes e métodos” e Domingo L. González Lopo de “A prata de Indias e o Barroco galego. Migración e mecenado artístico”.
O curso contaba coa homologación como actividade formativa para os alumnos do Programa de Doutoramento en Historia, Xeografía e Historia da Arte da USC.