Consumo intensivo de alcohol en jóvenes universitarios: Un estudio de seguimiento mediante neuroimagen estructural

O binge drinking (BD) defínese como un patrón de consumo de alcohol intensivo e intermitente, polo cal, nun curto espazo de tempo, alcánzanse concentracións de alcohol no sangue iguais ou superiores a 0,08 g/dL. Esta forma de consumo ten unha alta prevalencia entre os estudantes universitarios e está asociada a distintas anomalías neuropsicolóxicas, neuroestruturais e neurofuncionais. Co obxectivo de proporcionar unha visión completa dos
efectos do patrón BD na arquitectura e o funcionamento do cerebro adolescente, nesta tese realizouse, en primeiro lugar, unha revisión sistemática dos estudos de neuroimaxe. Esta revisión identificou algunhas rexións cerebrais como dianas específicas onde as anomalías observadas en mozos e adolescentes binge drinkers conflúen de forma máis consistente. Ademais, este traballo revelou a escaseza de estudos lonxitudinais que permitan determinar o
impacto a medio/longo prazo do BD. Sobre esta base, levouse a cabo, en segundo lugar, un estudo de resonancia magnética estrutural co fin de caracterizar as consecuencias do mantemento dun patrón BD en tres características da sustancia gris (i.e. o grosor cortical, a área de superficie e o volume). A mostra final incluíu mozos con e sen BD que foron avaliados inicialmente á idade de 18-19 anos e posteriormente despois dun período de 2 anos, cando tiñan 20 – 21 anos. Os resultados obtidos revelaron que os binge drinkers que mantiveron unha traxectoria estable de consumo BD durante o seguimento, en comparación cos controis, presentaron anomalías neuroestruturais en diferentes rexións corticais (i.e. ínsula esquerda, xiro frontal medio rostral dereito) e subcorticais (i.e. núcleo accumbens dereito) estreitamente implicadas nas funcións executivas, a regulación emocional e o procesamento
de recompensas. Así mesmo, algunhas destas anomalías foron dependentes do sexo dos participantes e poden reflectir un efecto diferencial do patrón BD nos procesos típicos de neuromaduración.