Ir ao contido principal

Doallo Pesado, Sonia

Profesora Titular de Universidade

sonia.doallo@usc.es

Posto actual

Profesora Titular no Departamento de Psicoloxía Clínica e Psicobioloxía da Universidade de Santiago de Compostela.

Intereses científicos

O meu principal interese é a interacción entre procesos cognitivos e procesos emocionais e motivacionais. Actualmente a miña actividade investigadora céntrase no estudo dos mecanismos neurais que median a interacción entre atención, memoria e motivación, empregando rexistros de potenciais evocados (PEs) e imaxe por resonancia magnética funcional (IRMf). O meu interese principal diríxese particularmente a coñecer os mecanismos neurais que median a influencia do valor motivacional da información, definido polo seu valor de recompensa (positivo ou negativo), sobre os procesos de orientación da atención guiados pola información na memoria a longo prazo. Así mesmo, actualmente investigo os efectos dun consumo intensivo de alcohol (binge drinking) sobre a memoria declarativa e as funcións executivas en poboacións non-clínicas de xoves.  En relación con esta liña, o meu interese diríxese principalmente a examinar, mediante imaxe por resonancia magnética (IRM) e técnicas morfométricas (voxel-based morphometry), as potenciais anomalías estruturais asociadas ao patrón binge drinking que poidan ser postas en relación co funcionamento neurocognitivo.

Nota curricular

Licenciada (1998) e doutora (2006) en Psicoloxía pola Universidade de Santiago de Compostela (USC), cunha tese dirixida por Fernando Cadaveira e Socorro Rodríguez Holguín e financiada por unha bolsa predoutoral (FPU) do Ministerio de Educación e Ciencia. Durante a miña formación predoutoral, realicei unha breve estadía de investigación no Center for Mind and Brain dirixido por George R. Mangun na University of California, Davis. Tras doutorarme, realicei unha estadía postdoutoral de dous anos (2007-2009) no Brain & Cognition Lab dirixido por Anna Christina (Kia) Nobre no Department of Experimental Psychology (University of Oxford), financiada polo Ministerio de Educación e Ciencia e a Fundación Española para la Ciencia e la Tecnología (FECYT). Do 2010 a 2014 fun Investigadora do Programa Isidro Parga Pondal (Xunta de Galicia) na USC. En 2012, a Consellería de Educación e Ordenación Universitaria (Xunta de Galicia) concedeume un Proxecto para Investigadores Emerxentes de tres anos de duración para investigar as bases neurais da interacción entre atención, memoria e motivación, en colaboración con Kia Nobre (University of Oxford). Actualmente son Profesora Contratada Doutora no Departamento de Psicoloxía Clínica e Psicobioloxía da USC. A miña actividade docente desenvolveuse esencialmente na Licenciatura e no Grao en Psicoloxía da USC (Materias: Neuropsicoloxía; Fundamentos de Psicobioloxía; Neurociencia Condutual; Neurociencia Cognitiva) e, máis recentemente, no Máster Interuniversitario de Neurociencias das universidades de Santiago de Compostela, Vigo e A Coruña (Materia: Neurociencia Comportamental).

Publicacións