Control inhibitorio y consumo intensivo de alcohol en jóvenes universitarios: un estudio electrofisiológico desde los modelos del procesamiento dual

O consumo intensivo de alcohol (CIA) defínese como un patrón de consumo intermitente e en atracóns, co cal, nun intervalo de poucas horas, alcánzanse concentracións de alcohol en sangue superiores a 0,08 g / dl. O CIA ten unha alta prevalencia entre mozos e adolescentes, unha poboación que, por atoparse nunha fase crítica do neurodesenvolvemento, mostrase vulnerable aos efectos neurotóxicos do alcohol.
Os modelos neurocognitivos do procesamento dual propoñen que os trastornos por consumo de substancias e as condutas de risco durante a adolescencia poderían deberse ao desequilibrio entre dous grandes sistemas interrelacionados: o sistema automático-afectivo (implicado no procesamento motivacional e afectivo) e o sistema reflexivo (encargado do control inhibitorio). Partindo destes modelos, o obxectivo da presente tese foi avaliar os correlatos electrofisiolóxicos da inhibición da resposta e a súa interacción co procesamento de estímulos asociados ao alcohol en estudantes universitarios (18 anos) consumidores intensivos desta substancia. Para iso, rexistrouse a actividade electrofisiolóxica durante a execución dunha tarefa Go/NoGo de imaxes de bebidas. En ausencia de diferenzas entre grupos na execución da tarefa, as análises de voltaxe dos compoñentes de potenciais evocados (PEs) e as análises de conectividade funcional (CF) permitiron detectar diversas anomalías que suxiren que, no grupo CIA, o sistema reflexivo podería estar acudindo a recursos neurais compensatorios co fin de contrarrestar a sobreactivación do sistema automático-afectivo. Os resultados mostraron que o grupo CIA presentou maiores amplitudes de PEs (N2-NoGo) e varios padróns de hiperconectividade funcional (nas bandas de frecuencia theta e beta rápida) relacionados principalmente co proceso de montitorización do conflito e o control arriba-abaixo durante a inhibición satisfactoria da resposta motora predominante. Estas foron moduladas de xeito específico polo contido motivacional dos estímulos.