O futuro do medio rural depende do que as persoas decidan facer no presente. Para invertir a dinámica de despoboamento e abandono, cómpre contar cunha correcta diagnose do problema e entender as súas causas. Da mesma maneira, as experiencias de iniciativas dinamizadoras do medio rural xa existentes poden sinalar parte do camiño.
Esta é a idea que se encontra tras a primeira edición das ‘Xornadas sobre despoboamento no rural galego: Retos e oportunidades’, nas que participa o coordinador de Ecoagrasoc, Edelmiro López Iglesias, coa conferencia “Unha achega á realidade actual do noso rural e propostas orientativas de cambio e mellora”. O evento terá lugar o próximo sábado 29 de setembro na Casa do Concello de Sarreaus.
Despois da intervención de López Iglesias, o público coñecerá varias experiencias prácticas de proxectos dinamizadores do medio rural, tanto en Galicia como noutros territorios do Estado español e Portugal. Para iso, contarase coa presenza dos propios integrantes destas iniciativas (consultar programa).
Estas xornadas están organizadas polos Centros de Desenvolvemento Rural O Viso e Portas Abertas, no marco do programa de sensibilización e concienciación do despoboamento e a necesidade do emprendemento no medio rural impulsado desde COCEDER (Confederación de Centros de Desenvolvemento Rural).
· Lugar: Casa do Concello de Sarreaus
· Data: 29 de setembro de 2018
· Programa completo (pdf)