Un curso de verán da USC achega novas posibilidades sobre o aproveitamento agrícola e forestal dos lodos de depuradora
O curso Xornadas de boas prácticas na utilización de lodos de depuradora en solos agrícolas, forestais e espazos degradados analizará en Lugo as posibilidades de reutilización deste tipo de materiais e o seu aproveitamento como fertilizante. A actividade está dirixida polas profesoras Elvira López Mosquera e Rosa Mosquera Losada, e desenvolverase entre os días 5 e 7 de setembro na sede do Instituto de Biodiversidade Agraria e Desenvolvemento Rural (Ibader) do Campus de Lugo. O encontro comeza o día 5 de setembro coa mesa redonda ‘Estado actual da lexislación sobre o uso agrícola de lodos a nivel europeo, estatal e autonómico’ na que participan a subdirectora xeral de Residuos e Solos Contaminados da Consellería de Medio Ambiente, Verónica Tellado Barcia e a subdirectora xeral de Apoio a Explotacións Agrarias da Consellería de Medio Rural, Patricia Ulloa Alonso. Rosa Calvo de Anta presentará a continuación o seu relatorio ‘Normativa española de solos contaminados: metais pesados’, mentres que Rosa Mosquera falará sobre os elementos potencialmente tóxicos (EPT). A contaminación de tipo microbiano e a súa corrección por etapas de hixienización de lodos e de substratos ou emendas será o tema que desenvolverá na súa intervención Manuel Bao. A xornada péchase con senllos relatorios a cargo de Mª Carmen Mosquera (contaminantes orgánicos) e Francisco Omil (o problema dos cheiros e a súa mitigación). Todos eles forman parte do cadro de profesores da USC. A xornada do día 6 ábrese cunha mesa redonda sobre a valorización agronómica de lodos de EDAR e agroindustriais en terreos agrícolas e forestais, na que toman parte Josefa de León Blanco, da empresa Agroamb; Rosa Mosquera e Elvira López Mosquera. Tras esta mesa redonda o profesor da USC Felipe Macías Vázquez impartirá unha charla sobre a valorización de lodos en espazos degradados. A sesión de tarde deste segundo día estará dedicada integramente a visitar a depuradora da cidade de Lugo e a empresa xestora de residuos Agroamb. O venres 7 a actividade iníciase cun relatorio en torno á compostaxe de lodos de depuradora, por parte do profesor da Universidade de Vigo Domingo Pérez e unha segunda conferencia sobre tecnosoles a cargo de Felipe Macías García, da empresa TEN. A visita pola tarde á mina desta empresa en Touro (A Coruña) pecha o programa do curso.