O reitor entregará os premios do concurso para deseñar a imaxe da campaña de matrícula da USC en 2012-2013

O reitor Juan Casares presidirá este venres 20 a entrega de premios do Concurso de Ideas para o deseño da imaxe coa que a USC difundirá o vindeiro curso 2012-2013 a súa campaña de matrícula. A sesión comezará ás 12.00 horas no Salón de Graos do Colexio de San Xerome. O primeiro premio, cunha dotación económica de 1.000 euros, recaeu no estudante de 4º curso de Psicoloxía da USC Luís Eduardo Estévez Cachafeiro pola súa proposta ‘Universidade de Santiago de Compostela: investigando, descubrindo e creando cultura’. Xunto a el, o xurado decidiu outorgar un accésit, dotado con 600 euros, á estudante de Belas Artes da Universidade de Vigo Lilen Carletta pola idea ‘Construímos dende o coñecemento’. A idea gañadora utilizarase ademais para o material de difusión e promoción dos estudos da USC, tales como carteis, folletos ou páxina web. Á convocatoria podían concorrer estudantes universitarios e de ensino medio residentes en Galicia que cursen estudos en calquera centro da comunidade autónoma. Ademais da calidade e valor artístico, o xurado valorou positivamente que as propostas se adaptasen aos diferentes espazos e formatos nos que se poden incluír.