O programa ‘USC en transición’ organiza un obradoiro de hortos de balcón no Campus de Lugo

O programa ‘USC en Transición’, promovido pola Oficina de Desenvolvemento Sostible, organizou o xoves 12 un obradoiro de hortos de balcón na Facultade de Formación do Profesorado do Campus de Lugo. A actividade consistiu na construción de contedores con materiais de reciclaxe e a plantación de distintas variedades de especies hortícolas, ademais de plantas aromáticas e de flores, que favorecen a polinización. No curso do obradoiro, no que participaron estudantes, profesores e persoal de administración e servizos, ofreceuse información sobre as épocas de plantación e os coidados que precisan as plantas. O horto permanecerá exposto e visitable na Facultade de Formación do Profesorado, co obxectivo de que sexa empregado como elemento didáctico e para a organización de actividades participativas. Trátase dunha experiencia piloto que, ademais da súa propia continuidade como fundamento da actividade dun grupo de transición, busca que a iniciativa se estenda a outros centros e residencias universitarias, así como que poida ser adoptado na vida cotiá das persoas participantes. No contexto das comunidades en transición, os hortos urbanos pretenden asentar a produción de alimentos no contorno inmediato e favorecer a cohesión das persoas que comparten o interese por promover e practicar un estilo de vida máis sostible e respectuoso co medio.