A residencia Bal e Gay de Lugo celebrou o acto académico de imposición de becas colexiais

A residencia Jesús Bal e Gay do campus lucense celebrou recentemente o seu acto académico de imposición de bolsas colexiais aos estudantes que máis tempo levan aloxados no edificio, pertencente ao Servizo Universitario de Residencias da USC. Ademais do seu director, Fernando Losada Pérez, presidiron o acto o vicerreitor de Coordinación e Planificación do Campus de Lugo, Pedro García Herradón, e o vicerreitor de Estudantes, Cultura e Formación Continua, Francisco Durán Villa. Así mesmo, asistiron como convidados os directores das residencias compostelás Monte da Condesa, Francisco Orge Ventín, e San Clemente, Pastora Bello Bugallo. Durante o académico os doce estudantes que cumpren o seu terceiro ano como residentes recibiron unha banda conmemorativa. Soraya Mariño, unha das veteranas, interveu en nome do grupo de alumnos. Tamén se lles entregou un diploma como recordo do seu paso pola residencia aos cinco estudantes de intercambio que este ano se aloxan no edificio, chegados, entre outros lugares, de Francia, India ou Brasil. A subdirectora da residencia, Gloria Ramos, conduciu o acto de entrega, que rematou co recoñecemento aos gañadores do concurso de fotografía dixital organizado polo colexio maior. Finalmente, impúxoselle unha beca de honra a Anuska Mosquera Corral, ata o mes de abril responsable da Área de Residencias da USC, polo traballo desenvolvido no tempo en que ocupou o cargo. Os residentes máis veteranos recibiron unha banda conmemorativa Anuska Mosquera recibiu unha beca de honra polo labor desenvolvido como responsable da Área de Residencias da USC Un dos alumnos premiados no concurso de fotografía dixital da residencia recolle o seu diploma