Comeza unha nova edición do Programa de préstamo de bicicletas da USC

Por sexto ano consecutivo, a Coordinación do Plan de Desenvolvemento Sostible (PDS) da USC pon en marcha o programa de préstamo de bicicletas dirixido a todos os membros da comunidade universitaria tanto do campus de Lugo como de Santiago. En total cederanse gratuitamente preto de 300 bicicletas. O prazo para presentar solicitudes comeza o luns, 3 de outubro, ás 09.00 horas e durará ata o día 16 ás 14.00. As persoas que desexen participar terán que cubrir no apartado ‘Como podo participar?’ da web do Programa un formulario que será o que determine, por estrita orde de presentación, quen resulta beneficiario. Xunto coa lista de persoas seleccionadas e de agarda que se farán públicas na mesma páxina web darase a coñecer o día de recollida da bicicleta. Alta participación dos estudantes Na convocatoria do curso pasado 424 persoas solicitaron unha bicicleta. Deles, o 86% eran estudantes, o 6% persoal docente e investigador e o 4% persoal de administración e servizos. A Escola Politécnica Superior e a Facultade de Veterinaria de Lugo e a Facultade de Medicina e de Odontoloxía de Santiago foron os centros que maior demanda presentaron. Descontos para mercar bicicletas A USC asinou un acordo con empresas subministradoras de bicicletas localizadas nos dous campus para ofrecer distintas vantaxes e descontos en adquisición de bicicletas, materiais complementarios para os ciclistas, pezas de bicicletas e man de obra nos arranxos. As persoas interesadas deberán dirixirse a Bicicletas Oliveira, en Santiago de Compostela, e a MTC Bicicletas e Hijos de Félix Latorre, en Lugo, e presentar a tarxeta universitaria. Accións do PDS O Programa de préstamo de bicicletas enmárcase nas diversas iniciativas nas que traballa a Coordinación do Plan de Desenvolvemento Sostible para promover actuacións de mobilidade sostible nos campus universitarios. Entre as accións postas en marcha destaca o Programa Comparte Coche na USC que implica unha redución das emisións de CO2 e unha menor incidencia doutros problemas asociados ao tráfico como son a contaminación acústica ou a excesiva ocupación de espazos.