A Nobel de Química en 2009, Ada E. Yonath, pecha o cartel de ConCiencia para este ano

A única muller viva recoñecida co Premio Nobel de Química, Ada E. Yonath, visitará en outubro Compostela para participar no Programa ConCiencia que organiza a USC en colaboración co Consorcio de Santiago. Péchase así o programa para este ano que se anunciou hai unhas semanas e que tamén traerá á cidade aos Premios Nobel de Física 2007 Albert Fert, de Química en 1996 Harold W. Kroto; e de Medicina en 1993 Richard J. Roberts.
Ada Yonath (Xerusalén, 1939) recibiu en 2009 o Premio Nobel de Química polos seus estudos da estrutura e función do ribosoma, un galardón que compartiu cos científicos estadounidenses Venkataman Ramakrishnan e Thomas A. Steitz. Yonath traballa no Instituto Weizmann das Ciencias (Israel) e dirixe o Centro Helen & Milton A. Kimmelman de Estrutura e Montaxe Biomolecular, dependente do mesmo instituto.
A cristalógrafa israelí centrou as súas investigacións na tradución que fan os ribosomas da información do ADN para dar vida. O ribosoma é un complexo supramolecular queproduce proteínas a partir do ADN e que, por ser "crucial para a vida, constitúe un elemento importante para a elaboración de novos antibióticos", segundo informou no seu día a Real Academia Sueca das Ciencias.
Mulleres e NobelEn 108 anos de historia do Premio Nobel, o galardón en Química só recaera en Madame Curie, a súa filla e a británica Dorothy Crowfoot-Hodgkin. Ata o ano pasado que se lle concedeu a Ada Yonath non había viva ningunha muller con este premio. No tocante á Física só dúas mulleres o gañaron -de novo Madame Curie e Maria Goeppert-Mayer-, mentres que o Nobel de Economía se lle concedeu por vez primeira a unha muller o ano pasado.
Albert Fert a próxima semanaO primeiro convidado de ConCiencia deste ano é Albert Fert (Francia, 1938), Premio Nobel de Física 2007 polo descubrimento da magnetorresistencia xigante, que visitará Santiago a vindeira semana. Logo dun encontro cos medios de comunicación na mañá do xoves 29, Fert ofrecerá ese día unha conferencia, ás 20:00 horas no Centro Sociocultural Fundación Caixa Galicia (Carreira do Conde, 18), titulada ‘O mundo da espintrónica: electróns, espíns, computadoras e teléfonos’.Ademais, o venres 30 manterá unha xuntanza no CEA cos principais líderes españois no eido da ‘espíntrónica’, que contará con presenza do tecido investigador galego.