Arranca unha nova campaña de doazóns de sangue na USC

A nova campaña de doazón de sangue na USC desenvolverase nos vindeiros meses de marzo, abril e maio, co traslado das unidades móbiles do Centro de Transfusión de Galicia a distintas facultades e centros universitarios. Nos dous campos impartiranse ademais charlas explicativas e procederase á distribución de material informativo entre os estudantes e demais membros da comunidade universitaria co fin de concienciar da importancia e a necesidade deste acto solidario que pode salvar a vida de moitas persoas.
Na primeira fase desta campaña no actual curso académico, que se desenvolveu dende outubro ata decembro, houbo un total de 1.482 doazóns na USC, 1.186 no Campus de Santiago e 296 no de Lugo.
Estas campañas que se desenvolven na Universidade convértense cada ano no punto de entrada de moitos novos doadores. A día de hoxe, a contribución universitaria achega ao redor do 10% das necesidades de Galicia, onde se estima que se precisarán 125.000 doazóns para cubrir toda a demanda hospitalaria.