A Real Filharmonía de Galicia ofrece en Lugo o seu cuarto recital dentro do ciclo 'Formacións de cámara'

A Real Filharmonía de Galicia ofrece este mércores 7 ás 21:00 horas no Salón de Actos da Fundación Caixa Galicia de Lugo o cuarto recital do seu ciclo ‘Formacións de Cámara’, que interpreta na cidade coa colaboración da Vicerreitoría de Cultura da USC.
O cuarteto formado por Michal Ryczel (violín), Ildikó Oltai (violín), Timur Sadykov (viola) e Bárbara Switalska (violonchelo) será o protagonista deste concerto, no que interpretarán as pezas Cuarteto de corda nº 2, en Sol M, op 18 de Beethoven, Adagio de Barber e Cuarteto de corda nº 2, en La M, op 68 de Shostakovich.
‘Formacións de cámara’ é o primeiro ciclo que a Real Filharmonía de Galicia, orquestra xestionada polo Consorcio de Santiago, presenta en Lugo e consta dun total de seis concertos que se desenvolven un mércores ao mes ata xuño con entrada gratuíta.
Este ciclo permite que a singularidade artística de cada un dos compoñentes da orquestra se plasme en proxectos de cámara, ao tempo que se consegue unir os conceptos de música e patrimonio, levando os concertos ao centro histórico da cidade.
Os asistentes aos recitais poden gozar dun amplo repertorio camerístico da man dos solistas da orquestra que, para a ocasión, se agrupan en un sexteto, dous quintetos e tres cuartetos, con programas que inclúen pezas de compositores clásicos e contemporáneos. En total, escoitaranse en Lugo dezaoito obras musicais.