Radiofísicos e matemáticos estudan na USC tratamentos radioterápicos máis eficaces e menos agresivos

A Facultade de Matemáticas acolle este xoves o taller ‘Radiotherapy & Mathematics’ no que, organizado polo Nodo CESGA do Proxecto Ingenio Mathematica, se presentan diversos modelos utilizados para simular o comportamento do tumor en tratamentos radioterápicos, ademais das técnicas numéricas empregadas, os retos neste campo e a transferencia dos resultados.
Nos últimos anos fixéronse grandes esforzos no desenvolvemento de modelos matemáticos que describen o tratamento radioterápico, dende o punto de vista do cálculo das doses, a optimización de tratamentos ou a modelización do comportamento dos tumores cando se tratan con radioterapia, ben mediante o uso de algoritmos de tratamento da imaxe ou mediante a optimización de novos métodos baseados en datos biolóxicos.
O obxectivo deste taller é manter unha sesión de posta en común da modelización do tratamento de radioterapia con grupos de investigación relevantes en matemáticas e da comunidade hospitalaria, contando con destacados investigadores e expertos europeos en tratamentos oncolóxicos como Iuliana Dasu, da Stockholm University, ou Martin Frank, da RWTH Aachen University (Alemaña).