O Centro de Estudos e Documentación Europea da USC súmase ás actividades organizadas co gallo do Día de Europa

O Centro de Estudos e Documentación Europea da USC (CEDE) participa nas actividades promovidas co gallo do Día de Europa o vindeiro 9 de maio, data na que se conmemora a declaración de Schuman, orixe do actual proceso de integración europea.
Deste xeito, o sábado 8 a técnico do CEDE e profesora de Dereito Mercantil Elena Pérez Carrillo intervén a partir das 11:00 horas nunha mesa redonda sobre ‘Unión Europea: o valor do Tratado de Lisboa para o futuro dos cidadáns europeos’. Xunto a ela tamén participan a presidenta da Comisión de Desenvolvemento Rexional, Danuta Hübner, moderadora da sesión; o vicepresidente primeiro do Parlamento Europeo, Gianni Pittella; a ex deputada europea, Roselyne Lefrançois; e o eurodeputado, Antolín Sánchez Presedo.
Esta mesa redonda forma parte dunha xornada que se vai celebrar a partir das 9:30 horas no Auditorio de Galicia co lema ‘Camino de Santiago: Meta de Europa’. Con anterioridade á mesa redonda, o ex presidente do Parlamento Europeo, Enrique Barón, pronunciará a conferencia maxistral da xornada.
Outras actividadesPor outra banda, o director do CEDE asiste este venres 6 no Hotel Araguaney á conferencia debate ‘Situación actual e perspectivas de futuro na USC coa entrada en vigor do Tratado de Lisboa’. Paralelamente, colaboradores do centro están a desenvolver diversas iniciativas coas que se está a divulgar na comunidade universitaria o valor da ‘Semana de Europa’.