Unha mostra en Ciencias da Educación repasa as actividades e recursos educativos dos museos galegos

A Facultade de Ciencias da Educación albergará ao longo dos próximos trinta días a exposición ‘Actividades e Recursos educativos dos Museos de Galicia’, mostra que chega á USC logo de percorrer Galicia como complemento dunhas xornadas homónimas.
A exposición recolle material diversos daqueles museos galegos que dispoñen de Departamento de Educación ou Programación educativa estable. Deste xeito, nela exhibiranse plotters, recursos, actividades, oferta educativa e información variada de cada un dos centros participantes.
Esta é unha iniciativa que salienta o papel que os museos deben xogar no desenvolvemento integral dos cidadáns das sociedades nas que están inseridos como depositarios que son do patrimonio natural, artístico, histórico ou arqueolóxico das mesmas.