Especialistas de diversos países revisarán o futuro da Universidade na sociedade en rede

Expertos de distintos países reuniranse en Compostela os días 9 e 10 de xullo para analizar o futuro da Universidade española e latinoamericana e o seu papel formativo e investigador nunha sociedade global e nun entorno socio-económico de crise e incertidume.
O encontro ‘Universidade e Sociedade do Coñecemento’ contará coa presenza, entre outros, do profesor e investigador británico Ronald Barnett, especialista en didáctica e autor de varios libros sobre a institución universitaria que propón, fronte aos planos de estudos actuais, unha visión crítica e progresista do ensino superior; do catedrático da Universidade da Coruña Jurjo Torres Santomé, membro do consello asesor da publicación Curriculum Studies; e do investigador mexicano Imanol Ordorika, que busca propostas alternativas e orixinais ás estruturas educativas na actualidade.
A celebrar na Facultade de Ciencias da Educación da USC, a xuntanza quere abrir unha discusión sobre as demandas de formación e as liñas de investigación que identifiquen e axuden a comprender o papel da universidade na sociedade dixital, nun momento de cambio da estrutura universitaria en España por mor da implantación do Plano Bolonia. Os contextos e a proxección das universidades españolas, europeas e latinoamericanas conforman as perspectivas desta sesión interdisciplinar.
A análise dos participantes permitirá incidir no contexto das universidades iberoamericanas e os desafíos que implica a nova orde económica e social actual; a identificación das liñas de investigación que faciliten a comprensión, a avaliación e a toma de decisións sobre o papel da universidade no comezo do século XXI; o exame das relacións entre política, investigación e práctica educativa, e, por último, as demandas formativas neste contexto de complexidade e como se poden concretar no currículo do universitario.
UnisicO seminario está organizado pola rede Universidade e Sociedade da Información e do Coñecemento (UNISIC), iniciativa do grupo de investigación Stellae que leva traballando desde 2006 en diferentes proxectos de investigación e actividades de docencia en cooperación con varias universidades de América Latina. Os obxectivos destes profesionais xiran entorno aos procesos de adaptación da universidade contemporánea ás novas condicións impostas polas sociedades e economías da información e do coñecemento.