Inaugúrase este venres o primeiro Curso de Veterinaria en Fauna Silvestre

A USC inaugura este venres 17 ás 16:00 horas o primeiro curso de recuperación de especies mariñas e terrestres en Galicia, dirixido a estudantes e licenciados en Veterinaria, Bioloxía e enxeñarías Forestal e Agrónoma, e tamén a persoas interesadas en temas de recuperación da fauna silvestre.
As charlas, que se desenvolverán na Facultade de Veterinaria os días 17, 18 e 19 de abril, centraranse o primeiro día no traballo dos centros de recuperación de fauna silvestre en Galicia e na Coordinadora para o Estudo dos Mamíferos Mariños. A xornada do sábado estará dedicada aos aspectos prácticos do manexo e recuperación da fauna silvestre como as aves rapaces, aos rumiantes salvaxes, aos primeiros auxilios en tartarugas e mamíferos mariños e ás especies exóticas. Abordarase ademais o tratamento de enfermidades como a gripe aviar, a lingua azul e as epidemias en mamíferos mariños.
O encontro do domingo terá como eixo central o papel dos veterinarios na procura da conservación das especies salvaxes e proxectarase un vídeo sobre a organización do traballo veterinario durante o caso ‘Prestige’.
Os interesados en ampliar información poden consultar a páxina www.veterinaria-fauna-silvestre.org.