A USC recoñece o labor de Televes e do seu conselleiro delegado

A Facultade de Ciencias Económicas e Empresariais da USC celebrou este xoves o seu patrón, San Vicente Ferrer, cunha serie de actos nos que se recoñeceu o labor de Televés e, en especial, do seu conselleiro delegado José Gabriel Barreiro Pérez que recibiu de mans do reitor a insignia de ouro da USC. Barreiro, que foi presentado no acto polo profesor Justino Bastida, impartiu docencia durante vinte e cinco anos na Facultade compostelá ademais de ser membro do Consello Social da Universidade.
Na mesma cerimonia, a decana do centro, Maite Cancelo, entregoulle ao presidente de Televés, Ramón Bescansa, o premio Fulget 2008 en recoñecemento á súa colaboración en accións encamiñadas a mellorar as relacións entre a actividade académica da facultade e a súa contorna profesional. Lembrou a decana a longa listaxe de alumnos de Económicas e Empresariais que, grazas a Barreiro, fixeron prácticas na empresa e dos que un número importante se incorporaría ao seu cadro ocupando na actualidade cargos de responsabilidade no grupo empresarial.
Por outra banda, Televés é membro fundador de FEUGA e promotor e colaborador financeiro habitual en proxectos de investigación desenvolvidos en distintos departamentos da USC. Por último, estes recoñecementos queren tamén premiar o compromiso da empresa co desenvolvemento sustentable e a redución do impacto negativo das súas actividades e operacións sobre o entorno.
Entrega de diplomasContinuando coa celebración do patrón do centro, no mesmo acto tivo lugar a entrega de diplomas aos gañadores dos IV Premios á Calidade Lingüística dos Traballos Académicos, María Ángeles Pereira Sánchez e Manuel Arturo Cerviño Dobarro.
Recibiron tamén os seu diplomas os Premios Extraordinarios de Doutoramento do curso 2006-2007 Julio Pombo Romero, María Rosario Díaz Vázquez e María Inés Gundín Castro; e de Licenciatura 2007-2008 Pablo Barros Mato e Verónica Nogueiras Fernández.