Ábrese o prazo de inscrición para as escolas deportivas no Campus de Lugo

A Área de Deportes da USC abre a partir do martes 13 o prazo de inscrición para as escolas deportivas no Campus de Lugo. Esta actividade está orientada a todos os membros da comunidade universitaria e ten como obxectivo a promoción e potenciación do deporte.
O inicio das actividades será o día 26, cunha semana de portas abertas, na que as persoas interesadas poderán tomar contacto cos diferentes deportes ofertados. Desenvolveranse principalmente na Aula de Deporte e Cultura da Facultade de Veterinaria (ximnasia de mantemento, aeróbic, step, pilates, tai chi e danza oriental) e nos ximnasios da piscina das Pedreiras (ioga) e do Pazo dos Deportes (esgrima, acondicionamento físico e tiro con arco).
A inscrición farase na Oficina de Deportes do Campus de Lugo situada no Edificio da Biblioteca Intercentros.
Actividades ExternasDoutra banda, a USC ofrecerá descontos aos universitarios interesados en practicar diferentes actividades externas como o padel ou a hípica. A Universidade de Santiago ten ademais un convenio co Club Fluvial de Lugo para facer prezos reducidos aos estudantes.
A USC ten tamén un equipo de atletismo de membros da comunidade universitaria para participar de xeito gratuíto no Circuíto de carreiras ‘Corre con nós’ que organiza o Concello de Lugo. Así mesmo, durante o ano levaranse a cabo clases puntuais de distintas disciplinas deportivas que serán anunciadas ao longo do curso académico.