O venres péchase o prazo de presentación de candidaturas ao X Premio Aresa de Desenvolvemento Rural

O vindeiro venres 16 rematará o prazo de recepción de candidaturas para optar ao X Premio Aresa de Desenvolvemento Rural, que promoven conxuntamente a Universidade de Santiago e o Grupo Aresa. Ao certame poden concorrer persoas, grupos de investigación, institucións e empresas que contribúan ao desenvolvemento do medio rural galego.
Dotado con 10.000 euros, o Premio Aresa consolidouse ao cabo dunha década como un galardón de gran prestixio, ademais de ser tamén o mellor retribuído de cantos nesta especialidade se convocan en España. Entre os seus gañadores atópanse personalidades da talla de José Manuel Silva, actual director xeral de I+D+i da Comisión Europea, a Facultade de Veterinaria de Lugo ou a empresa cárnica Novafrigsa.
As candidaturas poden ser propostas ben a título individual polos interesados, ben por universidades, institucións públicas ou empresas. Entre os membros do xurado, cuxa composición definitiva anunciarase en breve, figuran o reitor da Universidade de Santiago, Senén Barro, e o presidente do Grupo Aresa, Álvaro Rodríguez Eiras.