Comeza a segunda campaña do Programa de Préstamo de Bicicletas da USC

O Programa de Préstamo de Bicicletas da USC iniciará esta semana, tanto no Campus de Santiago como no de Lugo, a súa segunda andaina coa entrega de bicicletas aos universitarios seleccionados. Esta iniciativa está promovida conxuntamente pola institución académica en colaboración coa Dirección Xeral de Desenvolvemento Sostible e a asociación ecoloxista galega Verdegaia.
As principais características desta iniciativa presentaranse en rolda de prensa este martes 25 nun acto, ás 11:00 horas na Sala de Prensa do Colexio de Fonseca, no que está prevista a participación da vicerreitora de Calidade e Planificación da USC, Dolores Álvarez; o director xeral de Desenvolvemento Sostible, Emilio Manuel Fernández; o coordinador xeral de Verdegaia, Xan Duro; e a coordinadora do Plan de Desenvolvemento Sostible da USC, Dora Blanco.
O programa de préstamo de bicicletas permitirá visualizar a viabilidade da bicicleta como modo de transporte permitindo que 300 persoas da comunidade universitaria teñan acceso a unha bicicleta durante os meses que dure a campaña. A entrega de bicicletas iniciarase o mesmo martes na Praza Rodríguez Cadarso diante dos tres Colexios Maiores da USC en horario de 12:00 a 14:30 horas.