A USC ofrecerá aos seus estudantes nove bolsas do Programa Santander-CRUE de Mobilidade Iberoamericana

O programa de bolsas ‘Santander-CRUE de Mobilidade Iberoamericana’ destinará durante o curso académico 2008-2009 un total de 500 bolsas de mobilidade para estudantes de todas as universidades españolasque forman parte da Conferencia de Reitores de Universidades Españolas (CRUE). O destino dos estudantes que se acollan a este programa serán institucións académicas de Arxentina, Brasil, Chile, Colombia, México, Porto Rico, Venezuela e Uruguay.
O programa de mobilidade internacional quedou formalizado este martes en Madrid co convenio asinado por Ángel Gabilondo, presidente da CRUE, e por Emilio Botín, presidente de Banco Santander. Do total das bolsas ofertadas, á Universidade de Santiago correspondéronlle nove. As bolsas repartíronse entre todas as universidades españolas seguindo criterios obxectivos en función do seu tamaño.
Cada bolsa Santander-CRUE de Mobilidade Iberoamericana estará dotada con 3.000 euros para sufragar os custes de matrícula se os houbera, así como o desprazamento, a manutención, os gastos de viaxe e o aloxamento. O obxectivo desta convocatoria é o fomento da mobilidade internacional, esencial para o desenvolvemento do Espazo Iberoamericano do Coñecemento.
Esta convocatoria enmárcase como parte dunha iniciativa de Banco Santander, que con motivo do seu 150 aniversario decidiu conceder 1.500 bolsas de mobilidade internacional para universitarios dos países iberoamericanos en que opera a División Global Santander Universidades do banco.