O Grupo Compostela de Universidades analiza en Santiago o papel das institucións de educación superior na sociedade da información

Representantes do Grupo Compostela de Universidade reúnense estes días en Santiago para traballar sobre o papel das institucións de educación superior na sociedade da información. A xuntanza, a desenvolver no Gran Hotel, comeza este xoves ás 16:00 horas cunha benvida do presidente do Grupo, Maurits van Rooijen.
A continuación, o membro da University of California Television Chris Price explicará a utilidade da ferramenta on line Equalito.com para a elección de carreira ou Universidade. Remata a xornada deste xoves cunha sesión de traballo sobre as oportunidades que as novas tecnoloxías lles ofrecen ás Universidades na busca de novos estudantes.
O encontro continúa este venres coa análise da comunicación no contexto do EEES, o deseño da comunicación corporativa na rede e os posibles cambios na comunicación interna do Grupo Compostela a través da implementación de novas tecnoloxías.
Ao remate, ás 14:00 horas, o presidente do Grupo, Maurits van Rooijen, será recibido polo reitor compostelán Senén Barro Ameneiro no seu despacho do Colexio de San Xerome.