A empresa de servizos socio sanitarios Atendo Calidade realizará descontos no seus servizos aos membros da comunidade universitaria

Co obxectivo de favorecer a conciliación da vida familiar e laboral de todos os membros da comunidade universitaria, a empresa de servizos especializados no eido socio sanitario Atendo Calidade ofrecerá unha serie de descontos no Centro de Día Atendo, situado no centro de Santiago, e nos servizos de axuda no fogar, entre outros.
Esta colaboración rexerase por un convenio de colaboración que asinaron protocolariamente o vicerreitor de Comunidade Universitaria e Compromiso Social, José M. Mayán Santos, e o administrador de Atendo, Santiago Vázquez García. Á sinatura tamén asistiron o director comercial da empresa, Luis Barras, e o coordinador do Servizo de Participación e Integración Universitaria, Javier Agrafojo.
Segundo o documento asinado este xoves, os universitarios beneficiaranse dun desconto do 10% no Centro de Día, así como unha tarifa especial no Servizo de Axuda no Fogar. Ademais poderán acceder a un desconto do 15% na compra de axudas técnicas para a adaptación do domicilio e que afectaría a adquisición de lavacabezas, colchóns antiescaras, cadeiras de rodas ou camas, entre outros. Finalmente, Atendo ofrecerá un desconto do 5% nos servizos de fisioterapia, perruquería e podoloxía a domicilio.
Para acceder a estas ofertas, as persoas interesadas deberá presentar a súa Tarxeta Universitaria de Identificación (TUI) como mecanismo para acreditar a súa vinculación á Universidade. A vixencia do convenio será de tres anos, prorrogable automaticamente por períodos anuais.
Con esta iniciativa promovida pola Vicerreitoría de Comunidade Universitaria e Compromiso Social, a USC busca satisfacer unha demanda solicitada pola propia comunidade universitaria e apostar así por iniciativas de proxección social, segundo explicou José M. Mayán Santos.