Comeza a tempada musical na USC

A tempada musical na Universidade de Santiago iniciarase este martes 21 co primeiro concerto do curso 2008-2009 do ciclo ‘Formación de Cámara da Real Filharmonía de Galicia’, incluído ademais no ciclo ‘Músicas na Compañía’. Nesta primeira cita musical do curso, prevista para as 20:30 horas na Igrexa da Universidade, Grigori Nedobora, violín; Tilmann Kircher, viola; e Plamen Velev, violoncello, interpretarán o Trío para corda en Si maior, D 471 de F. Schubert e o Divertimento en mi bemol maior, K 563, de Mozart.
Xa o mércores 22, dentro do mesmo ciclo, a Orquestra de Cámara Galega, dirixida por Rogelio Groba, ofrecerá un concerto especial con obras de Groba, Andrés Gaos e Rogelio Groba Otero. Este mesmo concerto poderase presenciar tamén no Campus de Lugo o venres 24 no Círculo das Artes a partir das 20:30 horas.
Semana de Benvida en LugoA actuación prevista para o Campus de Lugo forma parte da programación da Semana de Benvida que, ao abeiro do convenio Lugo Cultural, se está a celebrar na cidade da muralla. Esta iniciativa incluiría ademais o concerto, este luns 20 ás 21:00 horas de Magritte coa presentación de Viaxe á Lúa, no auditorio da Facultade de Veterinaria, mentres que para este martes 21 está programado un concerto de Panume ás 14:00 horas nos tellados da explanada do aulario da Facultade de Veterinaria e ás 21:00 o concerto do Grupo de Creación Musical da Vicerreitoría de Cultura, no Conservatorio de Música de Lugo.
A Semana de Benvida completaríase coa actuación de jazz a cargo de MR Dixie Jazz Band na vidreira da Facultade de Veterinaria o mércores 22 ás 21:00 horas, e coa actuación de Mala Herba na Escola de Formación do Profesorado o xoves 23 ás 21:00 horas.
Este conxunto de actividades resposta aos obxectivos da Vicerreitoría de Cultura de colaboración con entidades cidadás, abertura do patrimonio da USC á sociedade e a promoción de novos proxectos.