A Aula de Produtos Lácteos de Lugo clausura este venres o terceiro obradoiro de emprego

A Aula de Produtos Lácteos da Universidade de Santiago de Compostela celebra este venres 27, ás 12:00 horas, o acto de clausura do terceiro obradoiro de emprego ‘@PL3’, unha actividade de fomento do emprego subvencionada pola Consellaría de Traballo da Xunta de Galicia e o Fondo Social Europeo, no que participaron 40 persoas.
O acto de clausura deste obradoiro, que tivo un ano de duración, contará coa presenza do delegado da Consellaría de Traballo, Miguel Vázquez Calvo, e coa vicerreitora adxunta de Infraestruturas e Servizos, Celia Besteiro, ademais do director da Aula, Juan Méndez. Celebrarase nas instalación da Aula, no Pazo de Feiras e Congresos.
O programa do acto dará comezo coa visita das autoridades ás instalacións do obradoiro, seguido da presentación dos traballos desenvolvidos polos participantes deste ano. Tras a entrega de diplomas aos alumnos, haberá unha degustación de produtos lácteos elaborados polos alumnos.