A Facultade de Veterinaria acolle unhas xornadas para promocionar a investigación en niveis predoutorais

A Facultade de Veterinaria do Campus de Lugo será o escenario durante as vindeiras semanas da primeira edición das xornadas ‘A Investigación, dos Laboratorios ás Aulas’ organizadas pola Asociación para a Promoción da Investigación en niveis Predoutorais (APIP). As sesións celebraranse nas tardes dos días 8, 9, 10, 15, 16 e 17 de outubro e comezarán ás 16:00 horas estendéndose ata ás 21:00 horas.
Ao acto inaugural, que terá lugar o vindeiro luns, día 8, ás 16:00 horas no Auditorio da Facultade asistirán o vicerreitor de Coordinación do Campus de Lugo, Carlos Herrero Latorre; a decana da Facultade de Veterinaria, Ana María Bravo del Moral ; o director xerente do Hospital Clínico Veterinario Rof Codina, Luis Felipe de la Cruz Palomino; o director xeral de Promoción Científica e Tecnolóxica do Sistema Universitario Galego, Rogelio Conde-Pumpido Tourón; o director da Axencia para a Calidade do Sistema Universitario Galego, Julio Abalde Alonso; a responsable académica das xornadas; Buenaventura Cabezas del Toro; e o presidente de APIP, Ángel Abuelo Sebio.
A continuación comezarán os relatorios coa intervención do profesor do Departamento de Anatomía e Produción animal, Luciano Sánchez García, sobre razas autóctonas e produtos de calidade. Esta primeira sesión estará dedicada entre outros aspectos á xenética da conservación ou á aplicación dos marcadores moleculares na selección xenética e a xenómica aplicada á acuicultura, tema que será abordado polo profesor do Departamento de Xenética, Paulino Martínez Portela.
Ás 18:30 horas será a quenda da profesora do Departamento de Ciencias Clínicas Veterinarias Mª isabel Quiroga Berdeal que analizará as enfermidades e o sistema inmunolóxico dos peixes. Deseguido, o catedrático do Departamento de Ciencias Clínicas Veterinarias, José María Nieto Martínez, acompañado pola profesora do Departamento de Anatomía e Produción Animal Nuria V. Alemao Posadas disertarán sobre patoxenia da enfermidade de Aujeszky, enfermidades e sistema inmunitario dos peixes e diagnóstico anatomopatolóxico. Para rematar o primeiro día das xornadas terá lugar a intervención do facultativo do Rof Codina, Roberto Bermúdez Pose, sobre o servizo de diagnóstico anatomopatolóxico no Hospital Clínico Veterinario, seguido pola decana da Facultade Ana Mª Bravo del Moral que falará da Patoloxía en ratos transxénicos como modelo de enfermidades humanas.