A USC recoñece o esforzo dos mellores estudantes de Ensino Medio de Galicia nas probas de acceso á Universidade

A Universidade de Santiago, a través do Programa ‘A Ponte entre o Ensino Medio e a USC’, celebra este venres, día 20, o Acto de Recoñecemento aos mellores estudantes de centros de Ensino Medio de Galicia nas Probas de Acceso á Universidade deste ano. No acto, que terá lugar ás 18:00 horas no Salón de Actos da Facultade de Medicina, participarán mais de 205 estudantes acompañados de familiares e profesores.
Presidirá a entrega de diplomas o reitor da USC, Senén Barro Ameneiro, acompañado do alcalde de Santiago, Xosé Sánchez Bugallo; o presidente do Consello Social da USC, Manuel Puga Pereira; o decano da Facultade de Medicina, José Mª Fraga Bermúdez; o delegado da USC na CIUG, Manuel Bermejo Patiño; o coordinador do Programa A Ponte, Luís Hervella Torrón; e o vicedecano da Facultade de Filoloxía e presidente do xurado do Concurso de Relato Curto ‘Cómo te imaxinas na USC?’, Juan Casas Rigall; e o director do IES Sánchez Cantón de Pontevedra, Rafael Táboas Pastor, como representante dos centros de Ensino Medio de Galicia.
Todos aqueles estudantes de Ensino Medio que obtiveran unha cualificación igual ou superior a 9 recibiron a invitación para participar neste evento, xunto cos seus familiares e representantes de centros. Durante a celebración entregaranse tamén os premios aos gañadores da cuarta edición do concurso de Relato Curto ‘Como te imaxinas na USC?’.