A USC e a empresa Biomet 3i Dental Ibérica colaborarán no desenvolvemento tecnolóxico e deseño de implantes
O reitor da Universidade de Santiago, Senén Barro, e o director xeral da empresa Biomet 3i Dental Iberica, Jordi Carmona Vargas, asinaron este martes 18 un acordo marco de colaboración para o desenvolvemento de actividades conxuntas de investigación científica e desenvolvemento. No marco deste acordo, investigadores da USC traballarán no desenvolvemento tecnolóxico e deseño de implantes así como na realización de traballos de investigación clínica, experimental e aplicada. A de Santiago é a única universidades española que ten asinado un acordo deste alcance con Biomet, a empresa do sector da restauración odontolóxica número un en Estado Unidos e unha das tres máis importantes en Europa.
A sinatura do convenio desenvolveuse no Salón Reitoral do Colexio de San Xerome nun acto no que tamén estiveron presentes a directora do grupo de investigación da USC vinculado ao proxecto, Mercedes Gallas, o director comercial para España de Biomet, Julián Bejarano, e o delegado para Galicia, José Luis Mora.
Polo documento subscrito, a USC e Biomet colaborarán na execución de proxectos e programas de investigación e desenvolvemento, asesoramento en cuestións de interese mutuo, organización e execución de actividades comúns relacionadas coa promoción social da investigación e o desenvolvemento tecnolóxico e na formación de persoal investigador e realización de prácticas formativas.
O grupo de investigación do Departamento de Estomatoloxía da USC encargado de coordinar os traballos que se desenvolvan ao abeiro deste acordo está liderado por Mercedes Gallas e integrado ademais polos profesores Luís García Varela, José Luis Leyes Borrajo, Ignacio Rodríguez Núñez, Gonzalo López Castro e Pedro Guitián Lema, todos eles especialistas no eido da implantoloxía.
BiometFundada en 1987 por un especialista en periodoncia e un enxeñeiro baixo a denominación Implant Innovations, Inc (3i), Biomet foi unha das primeiras empresas que desenvolveu implantes de corte biolóxico e obtivo recoñecemento mundial grazas á superficie micro texturizada e ás excelentes porcentaxes de éxito clínico do implante OSSEOTITE. Nestes últimos 20 anos e despois de desenvolver o primeiro pilar estándar de 2 milímetros (1987), a superficie de implantes OSSEOTITE de dobre grabado ácido (1996), o protocolo de carga oclusal inmediata (2004), o implante Prevail con Platfform Switching integrado e múltiples solucións protésicas, o traballo da compañía achégase á nanotecnoloxía cunha nova xeración de implantes, os NanoTite.