Representantes das tres Universidades e da Xunta achegaron a oferta de ensino superior de Galicia á comunidade sudamericana

Do 5 ao 12 de setembro desenvolveuse con grande éxito en América un programa conxunto das universidades galegas, a Consellaría de Educación e Ordenación Universitaria e a Secretaria Xeral de Emigración, no que participou a Vicerreitoría de Relacións Institucionais da USC, a de Vigo e máis a Vicerreitoria de Estudantes da Coruña. Tratábase de presentar a oferta universitaria galega en Arxentina, Uruguai, Brasil, Venezuela e Estados Unidos, con especial atención ás comunidades galegas destes países, a través do programa de axudas e máis para galegos e máis fillos de galegos no exterior.
Era esta a primeira vez que se levaba a cabo unha iniciativa deste tipo, que recibiu unha importante resposta por parte dos sectores máis novos das comunidades galegas no exterior. En Sudamérica visitaron as Universidades de São Paulo e a Estadual de São Paulo; a de Ciencias Empresariais e Sociais de Uruguai; a de Bos Aires; a Católica en Arxentina e a de Belgrano. Ademais, mantiveron xuntanzas no Centro Galicia de Bos Aires e, en São Paulo, na Sociedad Hispano-Brasileira e no Instituto Cervantes.
As intervencións dos responsables universitarios e da Administración galega centráronse en achegar información sobre a estrutura universitaria e as formas de acceso así como da oferta académica das universidades de Galicia nos seus sete campus: titulacións de primeiro e segundo ciclo, masters propios, programas de doutoramento e Programas Oficiais de Posgrao (POP).
Outro dos obxectivos deste programa era establecer contacto cos galegos da diáspora para manter relacións estables e permanentes a través dos centros e entidades galegas. Ao mesmo tempo, achegóuselles información sobre as convocatorias de axuda para que podan estudar en Galicia.