Facultade de Formación do Profesorado
O produtor e guionista rabadense Pepe Coira impartirá as sesións formativas programadas ao abeiro deste curso, que se desenvolverá os venres en quenda de tarde na Facultade de Formación do Profesorado
O guionista, director de desenvolvemento e produtor executivo para diversas compañías cinematográficas Pepe Coira impartirá a partir do 7 de febreiro de 2020 o curso sobre o traballo de escritura de guión programado pola Área de Cultura da USC no Campus de Lugo ao abeiro do seu Espazo de Cine e para o que xa está aberto o período de matrícula.
As persoas interesadas en participar neste curso, cuxas sesións formativas se celebrarán na Facultade de Formación do Profesorado en quenda de tarde, de 17.00 a 21.00 horas, os venres comprendidos entre o 7 de febreiro e o 3 de abril, xa poden formalizar a súa inscrición nas oficinas da Área de Cultura, na Vicerreitoría de Coordinación do Campus de Lugo.
Este módulo formativo estruturado en 25 horas atende a tres cuestións básicas: para que serve un guión? De que está feito? Como é o traballo do guionista? A busca de respostas para estas preguntas corre en paralelo ao segundo grande aspecto do curso: unha introdución á práctica da escritura, desde a definición inicial dun proxecto ata a redacción do guión dunha curta.
O curso, a través do que se pretende familiarizar aos alumnos coas particularidades da escrita do guión, mestura aspectos teóricos e prácticos, se ben en todo caso o achegamento procura ir moi pegado á realidade da escritura do guión e á experiencia de ser guionista.