A taxa de positivos por COVID-19 entre o alumnado do SUR é do 0,5%

A taxa de positivos por COVID-19 entre o alumnado residente no Servizo Universitario de Residencias (SUR) da USC é do 0,5%, tal e como evidencian os resultados das probas PCR efectuadas ao longo desta semana polo Servizo Galego de Saúde en Santiago de Compostela. A administración sanitaria testou a 903 residentes o que supón unha adherencia do 83% ao chamamento do SERGAS. Parte do alumnado que se someteu á PCR non se atopaba en Compostela, feito que os obrigou a desprazarse expresamente dende os seus domicilios para efectuar a proba.  

O cribado identificou un total de tres casos positivos na Residencia Universitaria do Burgo das Nacións e un único caso no Colexio Maior Fonseca. Alén destes datos, tamén se detectaron dez positivos no Colexio Maior Universitario Xelmírez, residencia de carácter privado, non dependente do SUR. En total, sumando os casos de todas as residencias, tanto públicas como privadas, a taxa de positivos por COVID-19 entre o alumnado da USC é dun 1,4%.

Alén do Burgo e Fonseca, o Servizo Universitario de Residencias na cidade de Santiago de Compostela está integrado polos colexios maiores Rodríguez Cadarso, San Clemente e a Residencia Universitaria Monte da Condesa.