A EPSE e a spin off 3edata crean un modelo de produtividade do 'P. pinaster' en Galicia
Investigadores da Unidade de Xestión Ambiental e Forestal Sostible (Uxafores) da Escola Politécnica Superior de Enxeñaría do Campus de Lugo da USC e da spin off da USC 3edata, que ofrece solucións de enxeñaría a partir de datos ambientais, desenvolven un modelo de produtividade do piñeiro do país (Pinus pinaster) en Galicia, no marco du proxecto no que tamén colaboraron outros investigadores da Universidade de León e da Universidade de Arizona (EE.UU.), ademais do Servizo de Inventario Forestal do Ministerio de Agricultura, Pesca e Alimentación (MAPA) de España.
O traballo científico titulado ‘Developing a site index model for P. Pinaster stands in NW Spain by combining bi-temporal ALS data and environmental data’, do que, entre outros, son autores Juan Gabriel Álvarez, catedrático da USC na EPS de Enxeñaría, e o investigador de 3edata Juan Guerra, vén de ser publicado na revista de impacto internacional Forest Ecology and Management.
Os autores deste estudo presentan un modelo de Índice de Sitio para a especie P. pinaster no Noroeste de España no que mestural datos bitemporais de LiDAR aerotransportado pertenencentes ao Plan Nacional de Ortofotografía Aérea (PNOA) para os períodos 2009-2011 e 2015-2017. A citada achega científica tamén inclúe información obtida do Cuarto Inventario Forestal Nacional (IFN4, 2009) e do Inventario Forestal do Noroeste Peninsular (IFNN, 2018), ademais doutras fontes de datos ambientais, climáticos, edáficos e fisiográficos.
O Índice de Sitio (IS) é unha medida común de produtividade forestal dun lugar, servindo como base para a xestión forestal. Por iso, este traballo céntrase en xerar os modelos de Índice de Sitio empregando fontes de datos gratuítas e libres que están dispoñibles para a Comunidade Autónoma de Galicia. Entre os aspectos máis relevantes deste traballo, destaca que os modelos son aplicables a escala de rexional para xerar mapas espacialmente explícitos de produtividade a unha resolución e cun nivel de detalle moi elevado.
O traballo desenvolvido polos investigadores da USC e de 3 edata para a realización deste modelo de produtividade do Pinus pinaster contou co apoio do Programa Torres Quevedo do Ministerio de Economía, Industria e Competitividade, así como do proxecto VIS4FIRE, coordinado polo tamén catedrático da USC na Escola Politécnica de Enxeñaría Agustín Merino García, así como do Instituto Superior de Agronomía da Universidade de Lisboa e da Agrupación Estratéxica de Investigación do Campus Terra da USC (BioReDes), financiada pola Xunta de Galicia.