A presidenta da Confederación Empresarial Veterinaria Española (CEVE), Delia Saleno, ofrece este luns, ás 11.00 horas, a súa particular benvida ao novo alumnado de Veterinaria coa charla ‘Explorando camiños’, que se desenvolverá a través de Teams
A presidenta da Confederación Empresarial Veterinaria Española (CEVE), Delia Saleno, ofrece este luns, ás 11.00 horas, a través da plataforma telemática Teams, o relatorio titulado ‘Explorando camiños’, a través do que achegará a súa visión respecto da profesión veterinaria, así como das oportunidades de futuro. Esta actividade, promovida polo Decanato da Facultade de Veterinaria do Campus de Lugo da USC ao abeiro do programa de benvida ao novo alumnado de primeiro curso do grao en Veterinaria, encádrase no ciclo ‘Apaixonad@s pola Veterinaria!’.
A intervención de Delia Saleno poderá seguirse en directo a través da plataforma Teams, aínda que tamén será gravada. As persoas interesadas en participar nesta sesión poden solicitar a súa incorporación á plataforma Teams a través desta ligazón ou co código de equipo xv6089x.
O programa ‘¡Apaixonad@s pola Veterinaria!’ constitúe unha iniciativa de periodicidade mensual impulsada desde o comité consultivo externo da Facultade de Veterinaria de Lugo co obxectivo de que diversos expertos no sector analicen, debatan e aborden xunto con docentes e alumnado do centro cuestións de interese para a profesión, tal e como poden ser as saídas profesionais, demandas laborais, oportunidades de futuro e mesmo as súas respectivas experiencias vitais.
Delia Saleno
Delia Saleno é unha veterinaria cunha interesante e activa traxectoria profesional na que combina a súa actividade clínica coa actividade empresarial, a investigación, a docencia e a formación continuada. É fundadora e directora da Clínica Veterinaria Son Dureta de Palma de Mallorca, premio Eureka no ano 2008 e unha das clínicas veterinarias de referencia de Mallorca, onde numerosos estudantes de veterinaria de toda Europa aprenden a través do programa ERASMUS+.
Nos últimos anos, Saleno participa como representante do sector veterinario en distintos foros económicos, en comisións e grupos de traballo da CEOE e nos observatorios sectoriais e grupos de traballo do Ministerio de Educación, Ministerio de Traballo e Ministerio de Agricultura.