A vicerreitora de Coordinación do Campus de Lugo, Montserrat Valcárcel, presidirá este venres, ás 19.30 horas, no salón actos da Facultade de Ciencias, un acto académico no que participan 26 estudantes da sexta e da sétima promoción desta titulación da USC
A Facultade de Ciencias do Campus de Lugo da USC acolle este venres, ás 19.30 horas, no salón de actos José Rodríguez Mourelo, o acto de graduación das promocións 2016-2020 e 2017-2021 do Grao en Enxeñaría de Procesos Químicos Industriais, cuxa celebración se adiou por mor das limitacións derivadas da pandemia provocada pola COVID-19.
A vicerreitora de Coordinación do Campus de Lugo, Montserrat Valcárcel Armesto, será a encargada de presidir esta sesión académica, na que tomarán parte 26 estudantes das dúas últimas promocións do Grao en Enxeñaría de Procesos Químicos Industriais. O decano da Facultade de Ciencias da USC, Francisco José Fraga; o decano do Colexio Oficial de Enxeñeiros Técnicos Industriais de Lugo, Jorge Rivera; o deputado provincial delegado da área de Recursos Sostibles, Roberto Fernández, e a concelleira do Concello de Lugo da Área de Benestar, Inclusión e Persoas Maiores, Olga López Racamonde, completan a quenda de relatores que tomarán parte na sesión.
Os profesores do Departamento de Química Orgánica da USC na Facultade de Ciencias María Pilar Vazquez Tato e Eugenio Fernández Carrasco intervirán este acto académico en calidade de madriña e padriño, respectivamente, do alumnado da promoción 2017-2021, mentres que a docente do Departamento de Enxeñaría Química da USC María José Vázquez Vila oficiará como madriña da promoción 2016-2020 do Grao en Enxeñaría de Procesos Químicos Industriais.
Unha vez rematada a quenda de intervencións, a secretaria da Facultade de Ciencias da USC, a profesora Aida Jover Ramos, fará o chamamento de todos os graduados e graduadas para a corresponde entrega de diplomas e imposición das bandas de graduación.