Salón de actos José Rodríguez Mourelo
Os profesores da USC Ángeles Romero e Miguel Blanco actuarán como madriña e padriño da sétima promoción de titulados, no marco dunha sesión que comezará ás 18.00 horas
A Facultade de Ciencias do Campus de Lugo da USC acolle este venres, ás 18.00 horas, no salón de actos José Rodríguez Mourelo, o acto de graduación da promoción de titulados en Nutrición Humana e Dietética que completaron a súa formación entre 2016 e 2020 e que non tiveron ocasión de celebrar esta sesión académica por mor da pandemia derivada da COVID-19.
Os profesores da USC Ángeles Romero e Miguel Blanco actuarán como madriña e padriño da sétima promoción de graduados en Nutrición Humana e Dietética egresados da USC, no marco dunha sesión académica presidida pola vicerreitora de Coordinación do Campus de Lugo, Montserrat Valcárcel, e na que tamén intervirá o decano da Facultade de Ciencias, Francisco Fraga.
A deputada provincial delegada da área de Formación, Ensino e Economía do Coñecemento, Ana González Abelleira; a concelleira de Benestar e Inclusión do Concello de Lugo, Olga López Racamonde, e a presidenta do Colexio Oficial de Dietistas-Nutricionistas de Galicia, María González Rodríguez, tamén participarán como relatoras neste acto, durante o que Martín Patiño Vázquez e Laura Campello López, farán uso da palabra en representación do alumnado da promoción 2016-2020.