O xurado do certame promovido ao abeiro do convenio Lugo Cultural distinguirá cos premios Isidro Novo e Araceli Herrero as propostas con mellor calidade literaria e de comunicación. O traballo con mellor linguaxe visual tamén recibirá unha gratificación en metálico de 400 euros
O III Certame de Videocreación do Campus de Lugo, un certame audiovisual promovido pola Área de Cultura do Campus de Lugo da USC ao abeiro do convenio Lugo Cultural a fin de dar visibilidade ás novas linguaxes e dotado con 1.200 euros en premios, celebra este luns, ás 20.30 horas, no auditorio da Casa do Saber, a gala de entrega de premios. A proposta máis valorada pola súa calidade literaria recibirá o Premio Isidro Novo, mentres que o Premio Araceli Herrero distinguirá o mellor traballo de comunicación. A videocreación con mellor linguaxe visual tamén recibirá un galardón en metálico por importe de 400 euros.
A entrega de premios desenvolverase no marco dunha sesión aberta ao público na que se procederá ao visionado de todas as propostas presentadas a concurso. Ao seu remate, o xurado deste certame dará a coñecer o seu fallo e procederá á entrega dos galardóns.