Juan Casares Long e José A. González asinan a primeira tradución ao galego do Informe para o proxecto do Club de Roma sobre os retos da Humanidade
En 1972, Donella H. Meadows, Dennis L. Meadows, Jørgen Randers, e William W. Behrens III, integrantes do Instituto de Tecnoloxía de Massachussets, publicaban The limits to Growth, unha obra que sintetizaba o denominado Informe Meadows realizado pola reputada institución académica á petición do Clube de Roma para a análise dos retos da Humanidade cara ao futuro. O texto sostiña que o camiño que seguira a humanidade ata daquela era erróneo, e suxería alternativas para reconducir a situación, demandando actuacións con urxencia. Estas conclusións foron daquela duramente atacadas dende o poder establecido.
Cincuenta anos despois, chega á primeira tradución ao galego deste texto que se anticipou na necesidade de declarar a situación do planeta como de emerxencia. Juan Casares Long e José A González son os responsables desta nova tradución do libro que se suma ás máis de trinta linguas nas que o texto viu a luz e que publica este ano a Editorial Galaxia.
Os límites do crecemento presentarase o martes 14 de xuño ás 18.00 h no Salón Nobre do Pazo de Fonseca nun acto que contará coa participación dos tradutores do volume; do vicerreitor de Profesorado, Ernesto González Seoane; do membro do Club de Roma e vicepresidente do Capítulo Español do Club de Roma, José Manuel Morán Criado: e do presidente da Editorial Galaxia, Antón Vidal Andión.