O Centro de Estudos Cooperativos da USC celebra 20 anos de traxectoria
O Centro de Estudos Cooperativos (CECOOP), aprobado polo Consello de Dirección da USC con data do 16 de abril de 2002, foi creado por esta institución e a Xunta de Galicia, como Centro Universitario de carácter mixto dedicado á investigación, formación e estudo do cooperativismo nas súas dimensións económica e xurídica, nos ámbitos galego, español, europeo e internacional.
O 21 de outubro celebrará o seu vixésimo aniversario nun acto conmemorativo no que se presentarán as principais actividades realizadas ao longo da extensa traxectoria do CECOOP, que é o único centro de investigación galego en materia de Economía Social, membro de CIRIEC-España e da súa Rede ENUIES, de Centros e Institutos Universitarios de Investigación en Economía Social.
O evento desenvolverase na Facultade de Ciencias Económicas e Empresariais da USC, sede do centro, a partir das 11.00 horas e contará coa presenza do reitor da USC, Antonio López: da conselleira de Promoción do Emprego e Igualdade, María Jesús Lorenzana Somoza; do presidente de Foroesgal, Celso Gándara; do decano da Facultade de Ciencias Económicas e Empresariais, Xoán Doldán; da directora do CECOOP, Maite Cancelo ; do director de CIRIEC-España, José Luis Monzón; da presidenta de CIRIEC-España, Adoración Mozas, ; e do profesor da USC e presidente do Comité Científico do CECOOP, Manuel Botana.