XIV Congreso da Sociedade Española de Ciencias das Relixións

A Universidade de Santiago de Compostela acolle do 10 ao 12 de maio o XIV Congreso da Sociedade Española de Ciencias das Relixións. Baixo o título, 'Ad loca santa: lugares, espazos e presenzas', o encontro afonda da importancia da relación co espazo no fenómeno relixioso. A sesión inaugural terá lugar o mércores 10 ás 16.00 horas no Paraninfo da Facultade de Xeografía e Historia. 

Os lugares sacros e sacralizados, os santuarios, os templos, os lugares de culto e os espazos que se asignan á divinidade constitúen un dos dispositivos esenciais para comprender o que supón 'pór en escena o divino' e para mostrar como se establece a relación dos homes coa esfera do sacro. Neste senso, a percepción da divinidade con frecuencia realízase no espazo e materialízase a través do concepto de presenza e de visión da divinidade.  Así mesmo, a propia noción espacial que asigna un lugar privilexiado e marcado para o desenvolvemento das actividades relixiosas e cultuales xerou o fenómeno da peregrinación que implica unha percepción peculiar do espazo e o exercicio da relixiosidade.

A Sociedade Española de Ciencias das Relixións, en tanto que organización académica, destacou sempre polo seu carácter multidisciplinar. Por iso é polo que as temáticas dos Congresos se abordan desde unha ampla variedade de disciplinas científicas: a Historia, a arte, a Filosofía, a Literatura, a Lingua, o Dereito, a Socioloxía, a Ciencia Política, a Semiótica, a Psicoloxía, etc. Esa perspectiva multidisciplinar provoca achegamentos diversos que se enriquecen nun proceso de intercambio científico e académico, que permite establecer novas miradas conceptuais e metodolóxicas.

Ese é o obxectivo esencial do congreso que se desenvolve na cidade de Santiago de Compostela, unha cidade á que se asocia non só a peregrinación, senón a elección dun lugar privilexiado onde se expresaron aspectos do fenómeno relixioso que a converteron nun dos loca sancta no que materializar esta relación co divino.