O Grupo de Investigación Iacobus da USC e a Socidade Española de Estudos Medievais organizan este encontro que se desenvolverá os días 17 e 18 de abril na Facultade de Xeografía e Historia
A Idade Media é un período histórico que abarca desde o século V ao XV, e que naceu como idea no século XVI. Nese momento acoutouse como "medieval" o que sucedeu durante eses mil anos, e empezouse a empregar o seu contido en diferentes épocas e con intereses múltiples no político, o intelectual, o cultural, o económico ou o social. Tomando como base esta idea, a Xornada de Traballo 'Pensar a Idade Media Contemporánea' inscríbese no estudo do medieval e o seu uso nos diferentes presentes contemporáneos.
Organizada polo Grupo de Investigación Iacobus e a Socidade Española de Estudos Medievais, a Xornada desenvolverase do 17 ao 18 de abril de 2023 na Sala de Profesores da Facultade de Xeografía e Historia. Juan Manuel Monterroso e Israel Sanmartín, docentes e investigadores da USC, darán apertura ás 09.15 horas do luns a este encontro cuxo obxectivo é reflexionar sobre a utilización do medievo en diferentes 'momentos actuais' desde un punto de vista práctico e/o teórico, e expor cal é o significado do que uns denominan 'Idade Media Contemporánea', outros 'Neomedievalismo' e algúns 'Postmedievalismo'.
Cara a ese fin, a Xornada centrarase en seis eixos fundamentais: a España medieval na España Contemporánea, da man de Montserrat Ribao (Universidade de Vigo) e Raquel Crespo (Universidad Rey Juan Carlos), nunha mesa que moderará José Miguel Andrade (USC); as mulleres medievais na actualidade, con Gema Vallín (Universidade da Coruña), Marta Cendón (USC) e Diana Pelaz (USC), nunha sesión moderada por M. Ribao; os problemas historiográficos da Idade Media Contemporánea, nas intervencións de Antonio Huertas (Universidad Rey Juan Carlos) e Santiago Gutiérrez (USC), moderadas por Fernando López Alsina (USC); a Idade Media entre a historia e a arte contemporáneas, con María Luz Ríos e David Chao (da USC), moderadas por A. Huertas; os usos da Idade Media Contemporánea, grazas a unha sesión moderada por R. Sampredro na que intervirán Xosé M. Sánchez e Israel Sanmartín (USC) ; e as textualidades medievais e neomedievales, nun seminario de investigación con Antonio Huertas e Raquel Crespo Vila (Universidad Rey Juan Carlos).
