Organizada polo grupo HISTAGRA, será impartida por Ángel Alcalde, profesor da Universidade de Melbourne
O martes día 6 de xuño, o profesor Ángel Alcalde ofrecerá unha conferencia titulada 'Orixes do exterminio franquista: O proceso de toma de decisións rebelde no verán do 36'. Nela, presentará os avances da súa máis recente investigación sobre a violencia franquista durante a guerra civil.
O seu relatorio versará sobre a hipótese de que a violencia e as experiencias de combate da guerra foron o crisol ideolóxico fundamental do réxime franquista. Os sublevados eran un grupo de forzas reaccionarias e antiliberais con escasa coherencia ideolóxica ou política, pero emerxeron do conflito non só vitoriosos senón ideológicamente unidos baixo o poder do ditador.
Ángel Alcalde é profesor de historia na Universidade de Melbourne, Australia. Doutor en Historia e Civilización polo Instituto Universitario Europeo de Florencia, foi bolseiro postdoutoral da Fundación Alexander von Humboldt na Universidade Ludwig-Maximilian de Múnic. Tamén foi investigador postdoutoral no Instituto Leibniz de Historia de Europa en Maguncia, así como no Centro para a Historia do Desenvolvemento Global na Universidade de Xangai. A súa investigación centrouse na historia social e cultural da Guerra moderna, a historia transnacional, e a historia do fascismo.