A finalidade última do ‘Proxecto Nós’ é situar o galego na vangarda da intelixencia artificial e das tecnoloxías lingüísticas para posibilitar o uso natural desta lingua nas interaccións dixitais entre as persoas e os dispositivos tecnolóxicos.
O acto de presentación das primeiras ferramentas do Proxecto Nós desenvolverase o luns 5 de xuño a partir das 12.30 horas no Edificio Fontán da Cidade da Cultura. Contará coas intervencións do reitor da Universidade de Santiago de Compostela Antonio López; do conselleiro de Cultura, Educación, FP e Universidades Román Rodríguez; do director de AMTEGA, Julián Cerviño Iglesia; do director do CiTIUS, Senén Barro; e da directora do ILG, Elisa Fernández Rey.
Proxecto Nós
Nós é un proxecto inédito en Galicia que permitirá xerar os recursos dixitais e lingüísticos precisos para facilitar o desenvolvemento de aplicacións baseadas en Intelixencia Artificial (IA) e Tecnoloxías da Linguaxe (TL) tales como asistentes de voz, tradutores automáticos e axentes conversacionais en lingua galega.